O pasado 30 de Agosto, algúns membros do Proxecto Equus estiveron presentes en Darfo Boario Terme (Italia) co gallo da celebración do 20th International Rock Art Congress IFRAO 2018.
Eloy Martínez, Xosé Lois Vilar e Xilberte Manso, membros da sección de arqueoloxía do Instituto de Estudos Miñoráns (IEM), presentaron nesta reunión internacional algunhas xoias da arte rupestre do sur da provincia de Pontevedra e do norte de Portugal. A investigación, enmarcada dentro do Proxecto Equus, ten como obxectivo o estudo dos petróglifos con representación de équidos existentes no sur da provincia de Pontevedra e no norte de Portugal. Trátase dun proxecto iniciado oficialmente en 2015, pero que en realidade remonta a súa orixe a máis de 10 anos vinculados coa investigación da arte rupestre e, neste caso, coas escenas de caza dos petróglifos galegos e portugueses.
Como xa comentamos noutras ocasións, o proxecto vén de confirmar a existencia dun novo paradigma no modelo de representación de cuadrúpedos na arte naturalista. Mentres que cara o norte do fondo da Ría de Vigo o animal multirrepresentado é o cervo nas escenas de caza, cara o sur da provincia de Pontevedra e norte de Portugal o animal preponderante pasa a ser o équido, sendo escasas as mostras nas que o cervo está representado. A presentación do proxecto tivo lugar no Palazzo dei Congressi d’arte Rupestre, en Darfo Boario Terme, e estivo enmarcada na sesión And the Holocene arrived. Post Palaeolithic Rock Art around the World.
Durante a comunicación The EQUUS project: a new paradigm for Galician and northern Portugal’s rock art, guiada por Eloy Martínez, déronse a coñecer algúns dos petróglifos con escenas de caza máis salientables do sur da provincia de Pontevedra e do Norte de Portugal, como é o caso do Outeiro dos Lameiros (Sabarís, Baiona), A Tomada da Regueira dos Barreiros (Couso, Gondmar) As Covas de Amorín (Donas, Gondomar), A Coutada (Taboexa, As Neves), A Pedra da Escorrega (Verdoejo, Valença de Minho) ou A Telheira (Verdoejo, Valença de Minho), entre outros.
O lugar escollido para a celebración desta XX edición do IFRAO non podería ser mellor. A cidade de Darfo Boario Terme está situada en Valcamonica, un val que conta cun dos maiores repertorios de arte rupestre do mundo, e que xa foi recoñecido en 1979 coa declaración de Patrimonio da Humanidade pola UNESCO.
O congreso, ademáis de servir como plataforma de divulgación dos resultados deste proxecto, supuxo un rico intercambio de experiencias e realidades presentes no panorama mundial da arte rupestre que seguro terá como resultado futuras colaboracións con profesionais deste eido.
EN PRENSA:
Tres investigadores do IEM presentan en Italia os resultados do Proxecto Equus
BOOK OF ABSTRACTS DO CONGRESO:
Proxecto Equus 