Editado polo Instituto de Estudos Miñoráns (IEM), vén de saír do prelo o número 21 da REM (Revista de Estudos Miñoráns), na que os membros do grupo de investigación do Proxecto Equus damos conta do descubrimento por Cándido Verde Andrés dun núcleo dunhas noventa rochas gravadas nas freguesías de Porreiras/Insalde (Paredes de Coura) con representacións xenuínas da arte atlántica e da arte esquemática, alén dun conxunto de catorce rochas con zoomorfos (équidos, cánidos, un cérvido) que confirma un dos postulados do Proxecto Equus.
No artigo Territorios e identidades. Arte rupestre ó norte e ó sur da Serra do Extremo comparamos o catálogo compacto xeograficamente do sur da Serra do Extremo co catálogo, a maioría inédito, do norte da mesma serra, nas ladeiras do Monte do Faro, para concluírmos coas características semellantes e diferentes de ambos conxuntos e albiscando a posibilidade de que marcasen territorios, contrastando as identidades dos grupos humanos que habitaron esta terra no longo proceso de domesticación.
Podedes ler o artigo no seguinte enlace:
Nos próximos días o IEM dará conta, a través canles habituais de comunicación, da presentación do seu último número da revista en formato físico. Estaredes convidados.
Proxecto Equus 